“大蒜”动迁“咖啡”地段来三_新闻台

　　文/邵永平

　　【新民晚报·推荐】相声，作为民间说唱曲艺个一种形式，迭张“全国粮票”老早就成为各类综艺节目勿可缺少个调味品，伊依靠“说学逗唱”个手段达到让人开怀大笑，为大家所喜欢。近年来，以海派清口脱颖而出个周立波讲个“大蒜咖啡论”，也引起交关人个关注搭议论。近抢把，北方一批新型个年轻相声团队搭仔个人开始陆续“南漂”开进上海滩。有人就突发异想：是勿是“大蒜”想来动迁阿拉“咖啡”地段？

　　相声垃拉“文革”结束后，出现了历史浪向第二次高峰期。以侯宝林、马三立等泰斗个大师为代表，朝后出现了以马季、侯耀文、高英培、苏文茂、郝爱民、李文华、姜昆、牛群、冯巩、笑林等中青年代表承上启下；红遍全国。尽管如此，上海人依旧钟情本土特色“说学做唱”个独脚戏；而相声名家到上海亮相，赛过“外星来客”，一晃就跑。主要原因还是因为方言习惯搭仔文化背景个差异。记得每趟碰到南北曲艺名家汇集申城同台交流，连侯宝林先生也会拱手让姚慕双、周柏春或者杨华生、袁一灵压台。北方个田耘社、乐透社、白领社、相声大会、品欢相声会馆咾啥相声团体纷纷下上海。由于水土不服，搿班人马尝足了文化苦旅个味道，但还是出现了勿少相声、相声剧新作，受到了一眼上海人个欢喜，引起一定反响。现在新个一代相声演员来上海开说相声，理由有三点。首先，“新上海人群”是听相声个主要对象。每年有交关新上海人到申城做生活，紧张个工作之余，听相声放松神经。其次，北京、天津个国有、私有相声团体饱和，混只熟面孔也要等半半六十日，还勿如走为上计。迭批队伍年纪较轻，文化程度蛮高，大多数人具有原创能力。其三，上海历来是个五方杂处个包容度大个城市。老底子上海人就有接纳各种思维个习惯，再讲艺人历来就有“四海为家”习惯，想当年梅兰芳先生靠传统京剧一炮走红上海滩，也不失为新生代艺术家个榜样。相信北方相声南下上海滩，也就是“大蒜”想来动迁阿拉“咖啡”地段，是有其道理个。

　　葛末是勿是来三呢？为了管理好迭支“野战部队”，市曲艺家协会还特特为成立了相声专业委员会，为北方兄弟提供咨询、搭建、交流、服务、管理等平台，为相声进入上海做了一件实事。相声达人郭德纲搭仔于谦今后每年会到上海开场子，再迭能下去，伊也会成为半个上海人了。如果北方相声以其优秀个表演段子为上海人所喜欢，迭个也是一桩老好个事体，不过，交关上海人还是欢喜看上海本地个戏，伸长头颈骨等拉海看到老老扎劲个“独脚戏”、“滑稽戏”咾啥，“大蒜”想来动迁阿拉“咖啡”地段，还是蛮难个。