西藏中路曾名“虞洽卿路”_新闻台

　　接老洋泾浜（今延安东路）西端个河道有南北向个泥城浜，开埠后垃拉搿条浜个东岸修建了滩路。1865年英租界区域路名大改动辰光，迭条滩路拨拉定名为“西藏路”。乃末到了1914年洋泾浜填没辰光，泥城浜同样也淤塞严重，只好也拿伊填脱，跟原来个西藏路一道合辟为大马路，新路仍旧叫“西藏路”，从此以后，迭条西藏路成为上海市中心南北向个顶为开阔个干道。

　　因地理位置重要，各种门类个商店及多种娱乐场所纷纷到此地开店。其中邪气有名个勿少，比如讲，旅馆饭店有一品香大旅社、爵禄饭店、大中华饭店、东方饭店、大陆饭店等；电影院戏院有大上海大戏院、皇后大戏院、国泰越剧大戏院、国联大戏院等；而顶让人觉着新奇个是，1915年至1918年间，由黄楚九等创办个“新世界游乐场”垃拉静安寺路（今南京西路）口破土而出。游乐场地跨路口南、北两个转角，下面有隧道连垃一道。场次内除脱演出京戏搭地方戏曲以外，还放映电影，而且配有弹子房、溜冰场跟中西餐厅、茶室等设施，“新世界”开创了上海大型游乐场繁荣个方向。更令人震撼个是，1936年海上闻人、宁波人虞洽卿过七十大寿辰光，垃拉上海旅沪宁波人经反复选择后，大胆个向当局提出拿“宁波同乡会”所在个西藏路改名为“虞洽卿路”以作永久纪念。租界工部局居然打破界内路名命名惯例，并同意拿迭条邪气有影响个南北干道正式改名为“虞洽卿路”。上海宁波人搭社会各界还特地为伊举行了隆重个庆祝，垃拉当时引起了老大个轰动。

　　勿过过了七年，到汪伪时期个1943年，上海租界以西方人命名个路名拨全部改为以中国各地个地名命名，垃拉迭一过程中，搿条以人名命名个“虞洽卿路”也一道拨拉改脱，仍旧恢复了老早个“西藏路”旧称。到1945年抗战胜利后，乃末再拨定名为“西藏中路”。