让童谣深入童心_新闻台_中国网络电视台

　　文/钱乃荣任向阳

　　【新民晚报·推荐】童谣有地方特色，上海过去个童谣大都是用上海话传唱个，十分亲切、自然，直接传达出小囡个童趣脱仔心声。就垃拉似懂非懂个幼年阶段，上海小囡就拉姆妈个身浪、身边，感受拉母爱温馨个快乐音韵：“摇啊摇，摇到外婆桥……”从童谣当中，小朋友一眼眼一眼眼个拨上海人爱个民风熏染，慢慢较慢慢较个拨上海个海派风味所感化。交关人侪讲：童谣是阿拉当年生活当中最勿会忘记个艺术创作；童谣是阿拉垃拉弄堂里向、操场高头、田横头上、马路边浪一道“疯”、一道白相个美妙旋律。听到搿点清新个童谣，让阿拉重新回到了天真无邪个童年，重新寻到了老早仔个童真感觉。

　　回想起来，当年阿拉是从童谣当中去认得跟了解了周围个世界，还唱仔童谣去做各种游戏，碰着陌生个小朋友。当大家一道唱起“落雨喽，打烊喽，小八腊子开会喽”，就邪气快变得像自己兄弟一样亲密无间。上海童谣是上海民俗个显示屏，更加是童心个养护液。童谣个语言好像似通非通，有辰光却体现出孩童时代个奇思妙想，像调侃爱哭个“哭囡”个“一歇哭，一歇笑，两只眼睛开大炮，开来高，吃块糕，开来低，吃鼻涕”，竟然拿眼睛想象作炮筒，唱出来个效果让“哭囡”笑出声来了。这种看起来有点怪异、勿合常理个口语，正是童心个生动自然个表述，正是童谣天真无邪个显现。从搿个当中还可以看出，童谣还有一种老可贵个“自然精神”，就是自己诞生、自由唱诵、自然传承。

　　现在勿是交关人垃拉呼吁要拨小人多一点自由活泼个空间，要好好较多保留一点童趣跟诗意吗？葛末让阿拉先从活跃跟传唱童谣做起好？勿妨拿“让童谣深入童心”作为目标，继续拿生动、灵巧、活泼、通俗、好记、可诵、易传个上海童谣梳理整理汇编成册；继续垃有个幼儿园试点教唱，结合游戏，让上海童谣再扩大试点范围，五年以后成为本市绝大多数幼儿园必备个游艺；继续调动多种艺术表现手段每年举办经典童谣音乐会让童谣得到新个传承；开展幼儿园之间、街镇之间、行政区之间直至全市个幼儿唱诵上海童谣比赛，让更多个幼儿唱起童谣、发挥天性、丰满童年；鼓励跟培育小人对上海童谣个喜好，想办法以小人为主让伊拉跟儿童文学作家、幼儿园老师、民间文艺家、爱好童谣的家长一道创作现时代个新童谣，试唱修改成功个，再推广开来，让上海代代侪出新童谣。尽管现在小人个娱乐生活出现了电子化趋势，白相玩具出现了智能化趋势，信息接受出现了网络化趋势，但是人总是垃拉继承前辈文化个前提下头成长个，搿些侪是可以垃诵唱上海童谣当中得到发扬个，何况阿拉还可以充分利用现代信息技术，积极有效个传播上海童谣唻。

　　总之，童谣是童心的自然流露，也是滋润和养护童心的乳液。让小人诵唱上海童谣，可以朝培养有情趣、懂生活、善交流、爱创造个小朋友个方向更加接近，可以让一个人终身受益。