琴日讲完毕业生嘅复杂心情，今日讲讲高考生嘅忐忑心境。真系好想代啲靓仔大声疾呼一句“放过我哋啦！”高考嘅紧张心情有时唔系自发，而系周遭带俾佢哋嘅。

　　比如，离考试仲有一段时间，啲家长已经进入全家严管戒备状态：老窦有欧洲杯都唔敢睇，惊住嘈亲个仔；落班准时返屋企，保持安静大气都唔敢抖；一早熟习赶考线路，仲准备埋“应急地图”。“超级妈妈”就变身“营养美味饮食天王”，每日自制私家汤、外卖营养品，煮爱心早餐、益智宵夜。一句讲晒：“备考试题塞满个脑，营养食品塞满个肚”，搞到啲血液都唔知应该谷上脑定系供给个肚。

　　老师化身“嫦娥”，日哦夜哦，讲来讲去都系一堂“恐吓课”。务求令考生知道“只要考得衰，呢世都无得追”；极力灌输“考到清华就富贵荣华，考个三本就揸兜洗碗”。所以就出现“吊针复习、打针提神、冷气开到尽、风扇吹到晕”嘅奇景，我谂如果吸毒唔犯法，为咗考高分嘅佢哋分分钟以身犯险。

　　有句呃人嘅废话叫做“压力即系动力”，呢句嘢认真害死人！我压几百斤石头落你度，你动俾我睇睇？减轻压力先有最大动力。考生身边嘅人，总系打住“我为你好”嘅旗号，不断做好多嘢出嚟增加考生嘅心理压力。心理承受力差啲嘅，未考试就已经去做“空中飞人”。令考生以为“考试唔系对自己负责，系对自己身边嘅人负责；考得差嘅，唔系对唔住自己，而系对唔住嗰班对自己有期待嘅人”。班细路都未出社会，就认为“人生”嘅意思系“为人哋而生”。

　　彭彭喺度恳请各位过度紧张、慌张、夸张嘅“三张家长、三张老师”，你哋放过班考生啦！一个心态开朗、身体健康嘅仔女，比起一部“考试机器”仲值得你哋骄傲。俾返休息时间同放松空间啲细路，朝早睇睇《新快报》，夜晚睇下《最新闻》，心情好、身体好，话唔定考得更高分数呢！

　　●网友你点睇

　　@懒虫虫喇：有时候都不知道自己这么拼命是为了什么，考到了又如何，考不到又如何，生活依然要过，自己开心努力过就得啦。

　　@X---标逢叶-缘：个个同学高考前都返到高一时光，有玩有笑，成绩同样好！何必以呢种形式嚟“抱佛脚”。

　　你有嘢想讲？

　　请上新浪微博@新快报阳光社区