猎豹BB，如假包换的广州女生，曾在奢侈品职场打滚，更流连于柴米油盐的生活，会赚钱理财，更爱花钱购物。

　　悭家Lady

　　人贵有自知之明，技术唔够人挥，就一定要识揾帮手！我拣嘅帮手？劲呀！就係高科技啰！

　　当年一句家喻户晓广告词：“呢个係万宝路嘅世界！”将万宝路准确咁定位为男人烟。喺我嘅理解当中，同万宝路一样，大厨向来都係男人嘅世界，无论中厨西厨，大厨都係男士居多；而一讲到女人掌厨，好自然就被降呢（Level），称之为厨娘。如果将大厨比喻为善于长刀短剑嘅武将，咁厨娘往往就被拟作只懂剪纸绣花嘅闺中，难登大场面。但係现时大多数屋企反而都係厨娘嘅天下，仲係有好多好似我咁仲兼顾忙于上班加班嘅职业女性。当然初初受电视剧荼毒太深，认定煮得饭多肯定变黄脸婆，俾自己有藉口疏于落厨，终日流连于外卖加茶餐厅；但日子耐咗，唔止自己都吃到毋瘾，最弊係连屋企阿老细都诈型嘛！痛定思痛，决定向后厨进发！

　　睇个标题当然估到我嘅厨艺水平应属于懒羊羊级别嘅菜鸟，但我嘅目标当然希望表现得如美羊羊，有姿势有实际。相对精通厨艺，一双巧手可使唤出满汉全席嘅殿堂级师奶妈咪，我呢D一定係厨艺小儿科。不过，人贵有自知之明，技术唔够人挥，就一定要识揾帮手！我拣嘅帮手？劲呀！就係高科技啰！例如带预约功能嘅厨房小电器一定係懒厨娘最抵锡嘅心肝宝贝：电饭锅预约有饭吃，小熊蒸蛋器五分钟有水蛋吃，天际炖盅预约有汤饮，落班返黎炒埋个青菜，10分钟两餸一汤，白饭任装，况且小电器大多操作简便，就算点水皮，住家饭都好吃过外卖。当然，另外一个原因比改善自己伙食更重要：阿妈话斋，想留住男人嘅心，最紧要识留住佢嘅胃，肯落厨係个好开始。而五花八门嘅辅佐工具简直係进阶级懒厨娘嘅灵丹妙药：唔识刀斩，可以买把Vivtorinox鸡骨剪，唔识磨豆浆，可以买部九阳豆浆机；总之科技日新月异，哽有一个产品可以取代传统。最后唔好忽略，强大嘅网络绝对係懒厨娘有求必应嘅神符，有乜唔识，上网一定有答案！分分钟讲得啰嗦过阿妈，按住步骤做，大厨水准唔包，合格分数一定有。

　　最近升呢做咗个四人家宴，朋友对我嘅厨艺刮目相看，赞我有质嘅飞跃！哇！咁赞法简直好似话你猪扒变港姐咁威水！冷盘係碧簪镶润玉（其实係青瓜咸酸配热薯仔泥），汤係凤尾绕花开（咪係花生眉豆褒鸡脚啰），主菜係游龙嬉芙蓉（蛋白虾球），鸳鸯映明月（卤水鹌鹑蛋鹅掌亦），翡翠御如意（木耳炒西芹），饭后甜品係琥珀长相思（哈哈，应该估到係核桃露拼红豆沙）。无须设计技术含量高嘅菜品，多年奢侈品从业经验话你知，成功之处在于包装！米其林大厨掌厨嘅名流晚宴人人趋之若鹜，唔係D嘢有几好吃，反而係场面华丽，菜品装饰陈列别出心裁。

　　逻辑控嘅朋友肯定想问我点解係四人家宴？好吧，我承认懒厨娘屋企嘅锅碗瓢盆只够四人分餐上菜；另外，我确实有D后悔有自在唔享攞苦来呻，因分餐用咗太多碗碟，导致我洗咗成个钟碗。不过，贤妻良母确实係剂良药，佢代表嘅唔係单纯一个夸奖，最紧係寓意你娶得过！我估呢个point无乜女人唔受啰。