猎豹BB，如假包换的广州女生，曾在奢侈品职场打滚，更流连于柴米油盐的生活，会赚钱理财，更爱花钱购物。

　　悭家Lady

　　其实只要你嘅好奇心唔好只係停留响个价钱牌上，多去了解产品背后嘅故事，将奢侈品回归到必需品嘅消费概念，自然就会多几分底气，自己知道点去为自己选择。

　　唔少朋友叫我俾意见，点去选购奢侈品？我会问返你先：购物预算内，你会拣鸡头定凤尾？

　　一个品牌可以屹立百年不倒，个个都唔係二打六，肯定都有番几分斤两。我认为所谓品牌排行对普及品牌知识或者有D用，但更多反而会误导消费者迷信榜单，变成净係识拣最贵，唔去拣适合自己。纵观各名牌嘅起源，LV创始人本来係皇后嘅捆工，专帮皇室打包行李，品牌初衷係设计出更坚硬耐摔嘅旅行箱，适应长途旅行嘅颠簸；而爱马仕则以制造马具起家，我哋贡如上品嘅Birkin最初只係为咗方便旅行登机而设计嘅实用公事包。但现实中有几多人会深入研究品牌工艺，了解产品如何制成，再衡量售价同自己嘅需求才去购买？夸大其实际价值，使之变成炫耀资本嘅大有人在。有人死悭死抵，挨几个月面包甚至嗮半年工资就係为咗买个LV。

　　公车上有时会见到打扮精致嘅女孩，右肩优雅背着个小巧精致嘅2.55，但左手摞住个便当，右手摞住个电脑袋，反而搞到无手扶住扶手差点扑亲；究竟其时嘅2.55对于佢来说係美丽嘅点缀定係多余嘅负累呢？不经意间自己或已成为名牌奴隶而浑然不知？

　　其实奢侈品消费本身并无褒贬之分；相反，更多人愿意为奢侈品埋单，某程度说明我哋嘅个人品位同生活品质不断提升。回想下二十年前，手表、衣车、单车呢“三大件”就係当时嘅奢侈品，嗰时骑住部英国来佬“三枪”单车穿街过巷嘅威水程度绝不亚于依家揸部林宝坚尼；后来渐渐升级到电视机、冰箱同电话，呢D以前印象中嘅“奢侈品”，今日已係大家都可以拥有嘅必需品。时移势迁，究竟我们对待奢侈品嘅态度仲要停留喺炫耀嘅门面功夫上，定係可以更深层次淬炼得将奢侈品作为享受高品质生活嘅一种方式呢？

　　卓越品质，精湛工艺以及追溯其历史积淀，文化传承往往係顶级奢侈品成功嘅卖点，昂贵嘅价格反而係最后嘅因素。奢侈品唔一定就係最贵，而贵亦唔一定等同奢侈品。其实只要你嘅好奇心唔好只係停留响个价钱牌上，多去了解产品背后嘅故事，将奢侈品回归到必需品嘅消费概念，自然就会多几分底气，自己知道点去为自己选择。购物预算内，你会拣鸡头定凤尾？我就会选择前者，小鸡虽无凤凰地位尊贵，但鸡头高高昂起，係鸡嘅灵魂所在；凤尾嘅羽毛虽绚丽多彩反却容易凋零。一个Never full嘅价格我更情愿去买一个手工缝制，皮质优良嘅意大利独立品牌。

　　当我哋仲忙于攀比拥有嘅奢侈品没有最贵只有更贵嘅时候，唔好忘记其实时间先至係世界上最昂贵嘅奢侈品。每个人嘅幸福感其实係取决于8小时工作8小时睡觉之外嘅另外8个小时係点过。赚几多食几多着几多并唔重要，重要嘅係有人同你分享。与其花一万几买个名牌小心翼翼咁服侍佢，不如用呢个预算与家人朋友相聚同欢。几时都係独乐乐不如众乐乐嘛！